Բերիայի հավատացյալների պես

«Ամեն օր քննում էին Գրքերը, թե իրո՞ք սա այսպես է» (Գործք 17:11):

Միշտ մտածել եմ, որ եթե ամեն քրիստոնյա, ամեն քարոզիչ վարվեր Բերիայի հավատացյալների նման, հարանվանություններ չէին լինի, քրիստոնյաների միջև տարաձայնություններ չէին լինի:

Փառք Աստծուն, որ այսօր էլ կան Աստծո զավակներ, որոնք վարվում են Բերիայի հավատացյալների նման՝ ամեն օր քննում են Սուրբ Գիրքը, ամեն բան ստուգում են Աստծո Խոսքով, ու ես ուզում եմ մինչև վերջ մնալ նրանց շարքում:

Սուրբ Գրքով պիտի քննեմ ոչ միայն իմ լսած ամեն քարոզ, իմ կարդացած ամեն գիրք, այլև իմ ասած ամեն խոսքը, իմ կատարած ամեն գործ, իմ բոլոր մտածմունքները: Ամեն  բան պիտի քննեմ, տեսնեմ՝ համապատասխանում է Աստծո Խոսքին: Բերիայի հավատացյալները չունեին Նոր Կտակարանը, չունեին համաբարբառ, խաչաձև հղումներ, սուրբգրային համարների և բառերի որոնման ծրագրեր, բայց սերտում էին Աստծո Խոսքը ջանասիրությամբ, ոչ թե շաբաթը 1-2 անգամ, այլ ամեն օր: Այդ ամենն ունենալը լավ է, բայց ամենակարևորն է ունենալ այն, ինչ Բերիայի հավատացյալներն ունեին՝ սեր Աստծո Խոսքի հանդեպ. Աստծո Խոսքը իմանալու ու կատարելու փափագ:

22.12.12