2 Կորնթ.6:14-ը՝ մոռացված

Աստծո աղջիկներ, սիրելի քույրեր,

Մի կառուցեք դուք տունը նրա (Առակաց 14:1),

Ով կենդանի քար չէ մեր Տիրոջ տան մեջ, Նրա տաճարում,

Ինչու՞ եք աղոթում որ դառնաք պսակ դուք մեկի համար (Առակաց 12:4),

Ով մեր Տիրոջից այն փառավոր օրը պսակ չի ստանալու:

Ինչու՞ եք ուզում քայլել մեկի հետ, ով մեր Տիրոջ հետ քայլել չի ուզում.

Կարիք չունեք ծառայելու նրան, ով չի ծառայում մեր Հայր Աստծուն:

Գիտեմ, որ կասեք. «Երկուսը մեկից լավ է» (Ժողովող 4:9).

Աստծո Խոսքն է այդ ասում:

Այո, բայց երբ երկրորդը չի գործում Նրա այգում,

Միայնակ աշխատելը շատ ավելի լավ է:

Ավելի լավ է՝ սովորեք սպասել,

Համբերությամբ սպասել  Տիրոջ ժամանակին,

Ու եթե դա լինի Նրա ծրագրում,

Նա կդարձնի ձեզ պսակ գոհարներից թանկ

Այն մեկի համար, ով ասպարեզում վազելու համար

Ստանալու է պսակն անեղծանելի (1 Կորնթ. 9:25),

Մեր Տիրոջ հայտնությունը սիրելու համար

Արդարության պսակին է լինելու արժանի (2 Տիմ.4:8):

Փորձություններում ընտիր գտնվելով՝

Կենաց պսակն է նա ընդունելու (Հակոբ 1:12)

Ու գուցե Տիրոջ  հոտին խնամք տանելով՝

Փառքի անթառամ պսակն է ստանալու (1 Պետր.5:4):

Աստծո աղջիկներ, սիրելի քույրեր,

Մի կառուցեք դուք տունը նրա,

Ով կենդանի քար չէ մեր Հոր տաճարում:

2009 թ.

Հռիփսիմե Մկրտչյան