Երբ Աստված Իր ծառաներին տեղ է ուղարկում, Ինքն էլ նրանց հետ է գնում

 

«Ես ո՞վ եմ, որ Փարավոնի մոտ գնամ…»  (Ելից 3:11):

«Հիրավի Ես քեզ հետ կլինեմ…» (Ելից 3:12):

Երբ Մովսեսը հարց տվեց՝ «Ես ո՞վ եմ…», Աստված նրա հարցին չպատասխանեց, այլ Իր ներկայության խոստումով քաջալերեց՝  Ես քեզ հետ կլինեմ: Կարևոր չէր, թե ով էր Մովսեսը, կարևոր էր, թե ով է նրա հետ գնացողը:

Ոչ միայն Մովսեսին է սա խոստացված, այլև բոլոր նրանց ովքեր Աստծո գործն են անում, Նրա հանձնարարությունն են կատարում: Երբ Աստված նրանց ինչ-որ տեղ է ուղարկում,  Ինքն էլ նրանց հետ է գնում:

Նա գալիս է մեզ հետ, ուրեմն ճանապարհի վտանգներից չենք վախենա. Տերը պաշտպանում է մեզ:

Նա գալիս է մեզ հետ, ուրեմն ճանապարհին չենք մոլորվի,  Նա ճանապարհը լավ գիտի և առաջնորդում է մեզ:

Նա գալիս է մեզ հետ, ուրեմն մութ ժամանակ չենք սայթաքի, որովհետև Նրա Խոսքը մեր ճրագն է:

Նա գալիս է մեզ հետ, ուրեմն եթե առաջադրանքի վերաբերյալ հարցեր ունենանք, կարող ենք Նրան հարցնել:

Նա գալիս է մեզ հետ, ուրեմն ճանապարհը լինելու է ապահով, գործը՝ հաջողված:

Նա գալիս է մեզ հետ, ուրեմն գործի հաջողությունը մեզ չենք վերագրելու. Նա է ապահովել ճանապարհի անվտանգությունը,  Նա է շնորհել իմաստություն, գիտելիքներ, հմտություններ այդ գործը կատարելու:

Ուրեմն,  երբ Տերը գործ է տալիս, չասեմ՝ «Ես ով եմ», որովհետև գիտեմ, թե ով է Նա՝ իմ Առաջնորդը, Պաշտպանը, Ուսուցիչը:

Իմ օրագրից,

Հունիսի 25, 2022